早排就同史友們介紹過紫禁城內嘅一啲秘密房間，就算係皇帝一生人都可能只入過一次，而接下嚟阿史要介紹嘅呢道門就更加神奇，因為自此乾隆之後就再冇皇帝用過，到底當中有咩原因呢？阿史就同大家講一講啦！
要知道對古代嘅帝皇嚟講，皇權係由天授，所以即使嚟到近代嘅清朝，仍然都係嚴謹遵從「敬天地祭鬼神」嘅祭祀制度，愈係工序多嘅祭祀儀式，就愈被視為戚對上天嘅誠心。而喺清朝嚟講，喺祭祀前一天，其實就連皇帝都係需要依照住一條路線一路焚香一路禱告去到天壇位置，直到正式祭祀嘅時候，皇帝係需要足足磕頭66次，真係估佢唔到！
祭祀儀式要求之高即使係年輕嘅皇帝都相當吃力，更何況係上咗年紀嘅皇帝。當乾隆皇帝有返咁上下年紀嘅時候，身體虛弱嘅佢已經唔能夠完成成個流程，於是就喺60幾歲嘅時候喺祭祀必經之路上建立咗一道「花甲門」，直接取直道而行。
而到70歲之時，喺呢條路上又多咗一道「古稀門」以縮減祭祀行程，乾隆當時亦都下令，只有滿70歲嘅子孫先可以行過呢道門。之不過，其實自乾隆之後，就再冇一位皇帝咁長命喇！
原圖嚟自網絡